Finalizamos o curso cunha receita... moi xeada!
Despois de recoller os amorodos do horto escolar, os cales plantamos no educa-tribo de horticultura, fomos á aula de cociña para lavalos ben e realizar unha última receita: xeados de amorodos e laranxas en moldes con forma de estrelas e gatos.
A vindeira semana despediremos o curso refrescándonos cun xeado do máis natural (aclarar que non puidemos resistirnos a probar a receita, tal e como podedes ver nas imaxes da galería de fotos)
Presentamos os aniversarios lectores que celebramos ao longo do 3º trimestre: 8 aniversarios coa voluntaria e inestimable colaboración das familias.
Lecturas compartidas e diversas en forma de agasallo para todo o grupo-aula e dentro do programa Lectura e Familias.
O vindeiro curso, máis lecturas compartidas en familia!
Hoxe o alumnado de Educación Infantil e 1º de E.P. compartiron unha xornada de xogos na praia, tanto libremente como xogo de relevos, os aros, a petanca, pases... podedes ver todas as imaxes da xornada premendo no seguinte enlace: xogos na praia.
.jpg)
Finalizamos o curso coa tarefa integrada "Así son: animais e plantas". Actividades diversas que nos permitiron investigar, plantar, observar, crear, xogar... Ademais dos libros da nosa biblio, tamén aproveitamos os exemplares da maleta naturalista do CEIDA para para saber máis.
.jpg)
Retos cumpridos, da presentación que nos remitiu Leo, a nosa serea lectora:
2ºA_Así son: animais e plantas de Fátima Romero OlveiraPresentamos a última produción propia, grazas á colaboración das familias. Un receitario do máis diverso, receitas familiares propias que recollemos nun só documento para compartir con tod@s.
Animámosvos a que este verán... cociñedes en familia!
.jpg)
Presentamos a última actividade de centro relacionada co Día do Medio Ambiente: libros 3R.
Creatividade en acción, dando unha segunda vida aos libros expurgados: lapelas, transformación de ilustracións, novos elementos...
Reducindo, Reciclando e Reutilizando, todos os días do ano.
Celebrando o Día do Medio Ambiente presentamos o xogo de produción propia creado no 1º trimestre dentro da tarefa integrada "O noso universo".
Un xogo con casas especiais e casas-reto para desenvolver diversas aprendizaxes: Reducindo, Reciclando e Reutilizando.
Esperamos... vos divirta!
A última saída do curso foi do máis natural, visitando o Labirinto de Breogán (Vilarmaior) e o Parque Atenea (Arteixo)
Tod@s conseguimos chegar á torre central do labirinto, onde puidemos gozar das súas vistas e dos xogos tradicionais. Rematamos a xornada no parque, entre xantar e xogos compartidos.
.jpg)
Despedimos o curso na natureza, actividades de lecer ao aire libre entre compañeir@s.
.JPG)
Dentro do Programa Lectura e Familias recibimos á mamá de Daniela para compartir un conto con toda a clase co gallo do seu aniversario que será durante as vacacións do verán, concretamente o 8 de xullo.
O conto que nos leron foi Una historia de dos bestias, de Fiona Roberton.
Moitas gracias por vir e moitos parabéns por adiantado, Daniela. Unha aperta ben forte de tod@s nós.
O escritor Antón Cortizas, mestre xubilado, mantivo un encontro coas aulas de 2ºA e 2ºB/3º de primaria para falar sobre o seu libro, "Os versos da mariola", incluído no Plan Lector das aulas.
Unha xornada entre libros, brinquedos de papel e xogos de palabras que tan ben argalla Antón. Ao tempo, asinou os exemplares do alumnado, da biblioteca e entregounos un fermoso agasallo en forma de libro, "Tenrura", tamén asinado polo autor.
.jpg)
Agradecid@s a Antón pola súa amabilidade e bo facer, así como a Edicións Embora que nos facilitou o encontro.
Todo un éxito de xornada na nosa lingua, entre libros e brinquedos!
Actuación do alumnado de 1º E.P. coa colaboración da mestra de canto do conservatorio de Carballo e veciña de Malpica, Gloria Pardines, "San Hadrián é barqueiro".
Presentamos a nosa participación no Festival das Letras 2025 do CEIP Milladoiro de Malpica de Bergantiños.
Atendendo ao Día das Letras Galegas, que homenaxea á poesía popular oral, ás cantareiras e pandeireteiras, a aula de 2ºA cantamos e contamos!
Grazas infindas a Tania, María, Suso e familias pola colaboración e participación para que a nosa actuación se materializara.
Valorando e preservando a nosa rica tradición oral e cultural, todos os días do ano.
Feliz Día das Letras Galegas!
Conmemoramos o Día da Familia 2025 coas saídas, en familia, de cada un e cada unha de nós. Imaxes que forman parte do mural de centro, pechando o PDI que nos ocupou estes dous últimos cursos.
As imaxes falan por si soas, felices compartindo momentos en familia e se son na natureza... moito mellor!
Grazas familias, por compartir os vosos momentos con tod@s nós, e feliz día a todas!
Presentamos o noso cómic para o libro de produción propia de centro, Galicómic 2025, que garda relación co PDI.
Un cómic no que recollemos a nosa fascinación por un animal estraño e marabilloso: o axolote.
.jpg)
Ler para crer!
Seguimos celebrando aniversarios entre compañeiros/as coa lectura compartida de contos e a colaboración das familias. Hoxe tocoulle a Sara, que fai 8 aniños, e veu visitarnos a súa prima Isa. Leron para todos/as nós o conto Pápote a bicos, de Carmen Gil.
Moitas grazas por vir e MOITOS PARABÉNS, SARA!!
Entramos no mes de maio celebrando o aniversario da nosa compañeira Rosalía. Desta vez achegouse a súa nai para compartir con tod@s nós o conto Rosalía y las verduras que no se comía, de Paula Merlán. Un conto escrito en verso moi interesante e divertido que nos gustou moito.
Moitas grazas Rosalía e MOITOOOOSSS PARABEEEENNNS!!
As aula de 1º e 2ºA, seguindo a proposta de actividades relacionadas co PDI de centro, celebramos o Día Mundial do Libro saíndo á rúa para realizar a nosa Hora de Ler diaria.
Achegámonos ao parque de Seaia, camiñando, para xogar, logo merendar saudablemente arredor do gran mantel, voltamos xogar e pechamos a saída coa lectura dos títulos do plan lector de cada aula.
Unha xornada lectora e saudable!
Presentamos os aniversarios lectores que celebramos ao longo do 2º trimestre: 5 aniversarios coa voluntaria e inestimable colaboración das familias.
Lecturas compartidas e diversas en forma de agasallo para todo o grupo-aula e dentro do programa Lectura e Familias.
No 3º trimestre... máis aniversarios e lecturas!
O alumnado de 1º, 2º e 3º de primaria, grazas ao orzamento do Programa Innova, coñeceu e experimentou con Photon Robot, un novo recurso da nosa biblio creativa.
Da man de Flor, de Maker Store by Allknow de Carballo, programaron a Photon Robot para chegar a diversas emocións que foron descubrindo mediante un relato contado.
Seguimos ampliando recursos e formación en programación e intelixencia artificial para mellorar o ser e o saber... facendo!
As aulas de 1º e 2ºA realizamos unha saída a Mens e ao cabo de San Adrián de Malpica.
Unha xornada en contacto coa natureza, aproveitando o bo tempo despois de tantos días de chuvia, para celebrar a chegada da primavera, capturar imaxes para o Galicómic de 1º e gravar as pezas audiovisuais do DichoLeo de 2ºA.
Encantounos xogar e correr entre as flores, buscar minerais por San Adrián e mesmo ver algún barco faenando cerca das Illas Sisargas.
Un privilexio vivir e educarnos no rural, gozando da natureza e da paisaxe!
No día de hoxe as aulas de 1º, 2º e 3º de primaria visitamos a Radio Galega, grazas ao premio do VI Concurso de Podcasts-Radio na biblio que o pasado curso acadou o alumnado de 6º de educación infantil e que este ano cursa 1º de primaria.
Unha visita na que asistimos, en directo, ao programa "Galicia por diante" presentado por Kiko Novoa e Cristina García. Premendo no seguinte enlace poderedes escoitar, a partir de 1 hora e 48 minutos, a participación do noso cole:
.jpg)
Ao tempo, aproveitamos a saída a Santiago de Compostela para visitar o Museo de Historia Natural da USC que foi un peche de xornada fantástico porque a tod@s nos marabillou o que vimos: animais, minerais, plantas...
.jpg)
Unha saída a do 2º trimestre... do máis radiofónica e natural!
Alexia estivo de aniversario fai uns días e recibimos na nosa aula aos seus pais e á súa irmá, Uxía, e nos leron uns chistes moi graciosos cos que nos rimos moito. Gracias por vir!
Moitos parabéns Alexia polo teu 9º aniversario!
.jpg)
.jpg)
Atendendo á proposta de actividades anuais, as aulas de 1º e 2ºA realizamos a biografía das Pandereteiras de Mens para o mural de centro celebrando a Semana da Muller 2025.
Unha biografía que nos achegou ás Mulleres homenaxeadas o Día das Letras Galegas 2025: cantareiras e pandereteiras; cantando, contando, xogando na páxina web da Real Academia Galega:
Aprendizaxes cargadas de poesía popular oral, de Mulleres pioneiras que co seu tocar e cantar conservaron a nosa tradición para legarnos todo o seu saber e sentir.
Feliz Día da Muller 2025!
Presentamos o podcast que gravamos en Radio Balea, grazas a colaboración de Suso, María e Tania, dentro do programa Millainforma e conmemorando o Día da Muller e Letras Galegas 2025.
Un produto final onde recollemos a información que transformamos en coñecemento ao redor da poesía popular oral, das cantareiras e pandeireteiras, especialmente das nosas Pandereteiras de Mens.
Esperamos que vos guste, nós divertímonos aprendendo!
Hoxe conmemoramos o Día Internacional da Muller e na aula de 2ºA seguimos informándonos para redactar a biografía de cinco mulleres que abriron camiño a moitas outras co seu tocar e cantar, falamos das Pandereteiras de Mens.
Desde o Día de Rosalía ata o noso Mes das Letras, as Pandereteiras de Mens forman parte das actividades que desenvolvemos: recolleita de poesía popular oral, coñecer e cantar o "Maneo de Mens", organizar, coa axuda da nosa titora, toda a información para crear coplas e regueifar, tal como podedes ler na imaxe.
Actividades que nos permiten valorar e concienciarnos da importancia de coidar o noso patrimonio oral, a nosa lingua, e sentirse orgullos@s do legado que nos deixaron as nosas...
PANDERETEIRAS DE MENS
MULLERES PIONEIRAS,
de puño e sentimento.
Ao longo do mes de febreiro tivemos dúas visitas/colaboracións moi especiais: familias da nosa aula.
A familia de Catuxa, Suso e María, viñeron ensinarnos a cantar "Maneo de Mens" que inclúe unha das coplas que forma parte da recolleita de poesía popular oral realizada entre as nosas familias. Despois de practicar letra e ritmo subimos a Radio Balea a gravar todas as coplas.
Ao tempo, recibimos a visita de Tania, nai de Borja, acompañada de Belén, as dúas integrantes de A.C. Malante de Malpica de Bergantiños. Tania e Belén déronnos moita información sobre o tocar e cantar bergantiñán, así como se animaron a cantar coa estrea das nosas pequenas pandeireteiras.
Experiencias significativas e do máis produtivas para desenvolver a tarefa integrada que estamos a implementar este trimestre: Así vivimos!; e tamén dar tratamento o Día de Rosalía, o Día da Muller e o Día das Letras Galegas 2025.
Grazas infindas a Suso, María, Tania e Belén por legarnos o seu saber e a súa solidaria colaboración.
.jpg)
Axolotes de moitas cores para vivir un Entroido no que a natureza foi protagonista.
Feliz Entroido 2025 a tod@s!
No Entroido, ademais da aula multisensorial, tamén experimentamos coa técnica chroma na aula audiovisual. Técnica na que empregamos un fondo verde para superpoñer imaxes e realizar unha montaxe, polo que se imos vestidos con cores verdes... volvémonos invisibles! (algo que nos pasou a máis de un/unha coas cores verdes do noso disfraz)
No día de hoxe, viñemos ao cole co noso disfraz favorito e non podiamos perder a ocasión de gardar, en formato imaxe, os nosos gustos e preferencias de Entroido: policías, monstros, personaxes de animación infantil, de conto...
Un Entroido diverso e colorido que mañá, venres 28 de febreiro, remataremos co noso desfile polas rúas de Malpica: un entroido... do máis natural!
Celebramos o Día de Rosalía reproducindo na plantilla-pandeireta, facilitada polo equipo de BE-DL, unha copla do "Maneo de Mens" que tamén gravamos en Radio Balea para o vídeo da actividade de centro en relación co PDI que nos ocupa.
Ao tempo, organizamos a recolleita de poesía popular realizada entre as familias da nosa aula resultando outro produto final co cal podemos seguir investigando e aprendendo.
Grazas a todas as familias pola súa colaboración e... feliz Día de Rosalía, hoxe e todos os días do ano!
O pasado venres 21 de febreiro o alumnado de 2º, 3º, 4º e 5º de educación primaria desprazouse ao polígono de Bértoa en Carballo onde se celebrou a carreira de cross intercomarcal da zona de Bergantiños.
Esta carreira encádrase dentro do PVAD (Proxecto de vida activa e deportiva) na modalidade XOGADE sostida con fondos da XUNTA onde o centro participa por medio deste Plan Proxecta.
A carreira contaba cun total de 978 deportistas repartidos entre as distintas categorías (dende cadete feminino e masculino ata benxamín feminino e masculino).
Dende o CEIP Milladoiro, participamos coas categorías benxamín e alevín de ambos xéneros. O que se busca con esta iniciativa é que os nenos e nenas participen nun evento deportivo e experimenten a competición dende unha perspectiva lúdica, activa e participativa.
A resposta foi moi boa e os nenos e nenas volveron contentos e orgullosos despois de ¨competir¨ contra outros nenos e nenas da comarca. Tratábase de participar con valores, pero tamén con espírito de esforzo e superación, e así foi. Un sobresaínte para todos e todas os que se animaron a correr. Parabéns!!
Destacamos ademáis a clasificación de varios alumnos e alumnas, mellorando a clasificación do ano pasado. En benxamín feminino Alexia quedou de 3ª e Manuela de 7ª o que lles permitiu clasificarse para a final provincial. En benxamín masculino, Anxo acadou o 5º posto. En Alevín feminino Antía quedou de campiona e Clara de 13ª e en alevín masculino, Martín Martelo de subcampión.
Moitas grazas as familias polo apoio e colaboración.
Comparto a clasificación da carreira por categorías da web da Federación Galega de Atletismo:
Repetimos experiencias na aula multisensorial con recunchos de entroido: disfrazámonos, creamos, decoramos, construímos... experimentando cos cinco sentidos!
As aulas de 1º e 2ºA pasamos dúas xornadas do máis vivenciais e divertidas nun dos espazos creativos que conforman a nosa BE-LeoLab: espazos e recursos creativos ao servizo da comunidade e do currículo.
Premendo nos seguintes enlaces accederedes ao álbum de fotos de cada aula:
Seguro... repetiremos!
Presentamos un resumo audiovisual da actividade realizada, dentro da proposta de actividades do PDI de centro, para conmemorar o Dia da Non Violencia e da Paz.
Actividade na que desenvolvemos: lectura activa, reflexión, valores, creatividade e... convivencia intercentros!
Un novo reto que nos enviou Leo, a nosa serea lectora, tal e como se recolle na seguinte presentación, e que compartimos co CEIP de Tarrío (Culleredo) onde está o noso titor do pasado curso, Keko:
2ºA_Retos pola Paz de Fátima Romero OlveiraA imaxe fala por si soa, tal foi a emoción de realizar o reto e contactar con Keko e o seu grupo, que así o reflectimos na noticia da semana.
Polo DÍA ESCOLAR DA NON VIOLENCIA E A PAZ a nosa aula quixo sumarse a actividade de RETOS POLA PAZ que consistiu en crear un paraugas colectivo que tivese un poder máxico; un poder que faga deste mundo un lugar mellor, inspirándonos no conto O ladrón de paraugas.
Convidamos ao alumnado de 2º de Primaria do CPI As Revoltas a colaborar nesta iniciativa os cales aceptaron con moita ilusión. Para formalizar o intercambio de paraugas, ao mesmo tempo que nos coñecíamos, programamos para o día de hoxe unha videochamada.
O noso paraugas laranxa é o paraugas do RESPECTO e a CONVIVENCIA.
Ademáis do paraugas colectivo, cada neno e nena de ambos centros coloreou o seu propio paraugas e asignoulle o poder que quixo.
Podedes ver máis fotos do acto premendo neste enlace: PARAUGAS POLA PAZ
Retos pola Paz_2024-25 de bibliotecamilladoiro
.jpg)
Último aniversario do mes na nosa aula. Desta vez é Pedro quen fai anos e veu a súa nai compartir un conto con tod@s nós. Un conto moi chulo que non coñecíamos. Trátase de El largo viaje de Nanuc, de Toni Cabo. Gustounos moito, sobre todo a sorpresa final da carta.
Moitas grazas pola visita e MOITOS PARABÉNS, PEDRO!
