Presentamos o podcast que gravamos en Radio Balea, grazas a colaboración de Suso, María e Tania, dentro do programa Millainforma e conmemorando o Día da Muller e Letras Galegas 2025.
Un produto final onde recollemos a información que transformamos en coñecemento ao redor da poesía popular oral, das cantareiras e pandeireteiras, especialmente das nosas Pandereteiras de Mens.
Esperamos que vos guste, nós divertímonos aprendendo!
Ao longo do mes de febreiro tivemos dúas visitas/colaboracións moi especiais: familias da nosa aula.
A familia de Catuxa, Suso e María, viñeron ensinarnos a cantar "Maneo de Mens" que inclúe unha das coplas que forma parte da recolleita de poesía popular oral realizada entre as nosas familias. Despois de practicar letra e ritmo subimos a Radio Balea a gravar todas as coplas.
Ao tempo, recibimos a visita de Tania, nai de Borja, acompañada de Belén, as dúas integrantes de A.C. Malante de Malpica de Bergantiños. Tania e Belén déronnos moita información sobre o tocar e cantar bergantiñán, así como se animaron a cantar coa estrea das nosas pequenas pandeireteiras.
Experiencias significativas e do máis produtivas para desenvolver a tarefa integrada que estamos a implementar este trimestre: Así vivimos!; e tamén dar tratamento o Día de Rosalía, o Día da Muller e o Día das Letras Galegas 2025.
Grazas infindas a Suso, María, Tania e Belén por legarnos o seu saber e a súa solidaria colaboración.
Celebramos o Día de Rosalía reproducindo na plantilla-pandeireta, facilitada polo equipo de BE-DL, unha copla do "Maneo de Mens" que tamén gravamos en Radio Balea para o vídeo da actividade de centro en relación co PDI que nos ocupa.
Ao tempo, organizamos a recolleita de poesía popular realizada entre as familias da nosa aula resultando outro produto final co cal podemos seguir investigando e aprendendo.
Grazas a todas as familias pola súa colaboración e... feliz Día de Rosalía, hoxe e todos os días do ano!
Bo día a todos e a todas!
Como motivo da conmemoración do 8M, Día da Muller, visitamos a nosa Radio Balea para levar a cabo unha entrevista a unha galega para nós imprescindible: Rakele Cavallo, artista metade italiana e metade galega, a cal agradecemos a súa boa disposición e a súa participación nesta actividade.
Boas a todos e a todas!
Xa temos aquí a nosa entrevista polo Día Internacional da Muller!
No día de onte, todos os nenos e nenas da aula foron pasando pola nosa radio para elaborar unha entrevista a unha muller traballadora. Esta muller falounos un pouco sobre o seu traballo, a parte máis bonita e tamén a menos bonita (aínda que deixou algunha cousiña sen contar para que non nos puxeramos tristes).
Noela, grazas por vir á Radio Balea e responder a todas as nosas preguntas! Tamén quedamos moi contentos/as cos agasallos que nos trouxeches ;)
Boas a todos e a todas!
Estes días estamos cheos de actividades! O mestre Óscar, coordinador da Radio Balea, ofreceunos unha actividade de formación na radio.
Xa case somos uns expertos!
Pica na imaxe para ver máis fotografías da actividade.
Boas a todos e a todas!
O alumnado de 2º de Educación Primaria visitou esta semana Radio Balea para gravar un programa encadrado dentro do novo PDI, "Nós: Patrimonio In-Material".
Despois de facer unha choiva de ideas na aula e ver que era o que sabía cada un de nós sobre Malpica, montamos este pequeno programa onde expoñemos a idea inicial que ten o alumnado sobre o tema.
Espero que vos guste este primeiro Podcast!
Este curso, no Día Internacional da Muller, quixemos festexalo realizando unha entrevista a unha antiga alumna do noso colexio: a Yara Castro Ortega, de profesión cociñeira e rexente do Restaurante Casa da Vasca.
Preparamos entre todos/as as preguntas e convidamos a Yara a vir a Radio Balea, onde Noela, Siro e Lola lle fixeron a entrevista.
Esta é a carta a Rosalía que redactamos de forma colectiva na aula e que foi lida en Radio Balea por Celia e por Carlos.
Unha carta con moito sentimento, como a poesía que nos legou a nosa escritora máis querida.
Boas a todos e a todas!
O 24 de febreiro é o día de Rosalía de Castro e por iso realizamos unha actividade para a súa conmemoración.
O Equipo de Biblioteca propúxonos realizar unha carta expresando o que botamos de menos de antes da Covid-19, ao igual que Rosalía expresaba en moitos dos seus poemas o que botaba de menos da súa terra.
A carta colocámola no mural colectivo situado no primeiro andar do centro e podedes escoitala da voz de Antía, Leo e Saúl no seguinte podcast gravado na Radio Balea.
Boa tarde a todos e a todas!
Durante a semana pasada, e con motivo do Samaín, entre todos os nenos e nenas da aula inventaron dúas historias terroríficas.
Para darlle un toque de creatividade á elaboración destes contos, partimos do Binomio Fantástico de Rodari. Para quen non coñeza esta técnica de escritura creativa, consiste en quitar ao azar dúas palabras, sen relación algunha entre elas, coas que deberemos formar unha historia lóxica.
Para escoller estas dúas palabras, lanzamos ao aire un dado que contiña, en cada un dos seus lados, unha palabra. Para a primeira historia saíron as palabras BRUXA e ZAPATOS, e para a segunda, LOBOS e RADIO.
Posteriormente, dúas alumnas da aula, Candela e Valentina, acudiron á radio do centro para gravar estas historias.
Este foi o resultado!
